“Məktəbli” qəzeti sizi əməkdaşlığa dəvət edir!
Əziz məktəblilər!
Jurnalistika bu gün dünyada ən sayılıbseçilən peşələrdən biri hesab olunur. Jurnalistlər hər gün dünyada baş verən hadisələri milyonlarla insana çatdırırlar. Öz peşəsini sevən, işinə məsuliyyətlə yanaşan jurnalistləri hamı tanıyır. Jurnalistikanın təməli isə hələ radio, televiziya icad olunmamışdan xeyli əvvəl qəzetçiliklə qoyulub. Ona görə də dünyada ən qədim kütləvi informasiya vasitəsi qəzetdir.
Müasir dünyamız yeni texnologiya əsrinə daxil olsa da, qəzetçilik ənənələri bu gün də yaşayır. Hər gün dünya ölkələrində milyonlarla tirajda qəzetlər çap olunaraq satışa çıxarılır. Bu qəzetlər içərisində uşaqlar üçün nəşr edilən qəzetlər də az deyil. Uşaqlar bu qəzetləri oxumaqla həm oxu vərdişlərini təkmilləşdirir, həm də müxtəlif mövzularda dərc olunmuş yazılarla bilik və dünyagörüşlərini artırırlar. Unutmayın ki, jurnalistika ixtisası ali məktəblərdə öyrədilsə də, əsl bacarıq və vərdişlər redaksiyalarda qazanılır. Biz də bütün bunları nəzərə alaraq sizi redaksiyamızla əməkdaşlıq etməyə dəvət edirik!
Siz davamlı əməkdaşlıq etməklə (redaksiyaya müxtəlif mövzularda yazılar göndərməklə) artıq bizimlə gələcək jurnalistika fəaliyyətinizə indidən başlamış olursunuz. Sizin bizə göndərdiyiniz yazıların ən yaxşıları seçilib qəzetimizdə dərc ediləcəkdir. Bu yazıları isə sizin yaşıdlarınız olan digər məktəblilər, valideyinləriniz, müəllimləriniz də oxuyacaqlar.
Mən hansı mövzuda yazı hazırlayıb göndərə bilərəm?
Redaksiyamıza oxuduğunuz məktəb, dostlarınız, müəllimləriniz, yaşadığınız şəhər (kənd, qəsəbə) haqqında, eləcə də səyahət etdiyiniz yerlər barədə, sevdiyiniz idman növü və sair mövzularda maraqlı hesab etdiyiniz yazıları göndərə bilərsiniz. Göndərdiyiniz yazılar sadə qələmlə yazılmalı, hərflər oxunaqlı olmalı və 1 ədəd A4 formatı ölçüsünü keçməməlidir. Yazılan məqalələr heç bir yazıdan götürülməməli, öz düşüncə və fikirləriniz olmalıdır. Yazının sonunda isə adınız, soyadınız, oxuduğunuz məktəbin adı və sinifiniz qeyd olunmalıdır. Sonra yazdığınız bu yazıların aydın fotoşəklini çəkib bizə göndərin.
Gənc müxbirlər
Fərqli mövzularda yazılmış məqalələrin ən yaxşıları seçilib “Məktəbli” qəzetində dərc olunacaqdır. Biz redaksiya olaraq qərara almışıq ki, sizdən gələn yazıları əl yazısı şəklində qəbul edək və işıqlandıraq. Çünki belə olan halda yazı müəllifinin həqiqətən siz olduğuna daha böyük inam yaranır. Biz isə sizin yazdıqlarınıza heç bir düzəliş etmədən həmin yazıları qəzetimizin səhifəsində oxucularımıza təqdim edirik. Belə olan halda siz həm də gözəl və səhfsiz yazmaq bacarıqlarına yiyələnmiş olursunuz. Sonrakı mərhələdə isə bizimlə davamlı əməkdaşlıq edən şagirdlərin məqalə və reportajları çap formatında işıqlandırılacaqdır. Unutmayın ki, bizə maraqlı məqalələr, reportaj və müsahibələr göndərən şagirdlər “Məktəbli” qəzetinin rəsmi müxbirinə çevriləcəklər. Bu haqda gələcək nömrələrimizdə sizə ətraflı məlumatlar veriləcək.
Gənc fotoqraflar
Jurnalistikanın maraqlı sahələrindən biri də fotojurnalistikadır. Müasir dövrdə qəzet və internet jurnalistikasını fotoqrafiyasız təsvir etmək mümkün deyil. Çünki fototəsvirlər bizə gündəlik həyatımızda baş verən bu və ya digər hadisələr haqqında dolğun məlumat verir. Bu baxımdan müasir fotoqraf (fotojurnalist) yaradıcı olmalı, öz oxucusu və yaxud tamaşaçısı üçün maraqlı kadrları əldə etməyi bacarmalıdır. “Məktəbli” qəzeti də şagirdlərə bu cür vərdişləri aşılamaq üçün hər sayında sizin göndərdiyiniz maraqlı fotoşəkilləri öz səhifələrində oxucularına təqdim edəcəkdir. Biz sizdən peşəkar şəkildə çəkilmiş fotoşəkil tələb etmirik. Ancaq çəkdiyiniz fotoşəkillərin yaradıcı, düşündürücü, təsir gücü daha çox olanlarını seçib qəzetdə dərc edəcəyik. Növbəti nömrəmiz üçün “Yurdumuza payız gəlir” mövzusunda sizin çəkəcəyiniz fotoşəkilləri gözləyirik.
Qeyd olunan mövzuda yalnız bir fotoşəkil qəbul olunacaqdır. Fotoları mobil telefonla da çəkmək olar, ancaq şəkilin effektlərinə diqqət etmək lazımdır ki, aydın görünsün. Fotoşəkili göndərərkən adınız, soyadınız, oxuduğunuz məktəbin adı və sinifinizi qeyd etməyiniz mütləqdir.
Rəssam şagirdlər
“Məktəbli” qəzeti rəssamlığa həvəsi olan, gözəl rəsmlər çəkən dostlarını da unutmayıb. Bəlkə də həmin şagirdlərin bəziləri gələcəkdə tanınmış rəssam olacaq və yaxud qəzet, kitab və digər çap məhsulları üçün müxtəlif mövzularda rəsmlər çəkəcək. Nəzərə alaq ki, rəssamlıq da yaradıcı sənətdir. Sizin qəzetimiz üçün çəkib göndərəcəyiniz rəsmləri qəzetin digər oxucuları da görəcəkdir. Belə rəsm əsərləri gələcəkdə qəzetimizin də dəstəyi ilə keçirilən müsabiqələrə təqdim oluna bilər. Bu bacarığınızın sayəsində siz tanınmış rəssamlarımızla da əlaqə yarada bilərsiniz. Buna görə də əziz şagirdlər gələcək nömrələrimiz üçün sizin də əl işlərinizi gözləyirik. Gənc fotoreportyorlarımızda olduğu kimi sizdən də “Yurdumuza payız gəlir” mövzusunda rəsm nümunələri gözləyirik.
Diqqət: “Məktəbli” qəzetinə göndəriləcək yazı, fotoşəkil və rəsmlər hər ayın 1dək qəbul olunacaqdır. Göndərəcəyiniz materiallar haqqında redaksiyanın vatsap telefonu (qəzetin sonuncu səhifəsində qeyd olunub) ilə əlaqə saxlayıb əlavə məlumat ala bilərsiniz. Hər birinizə uğurlar arzu edirik!
Unutmayın ki, “Gənc müxbirlər” sizin səhifənizdir!